У Дзень Незалежнасці Рэспублікі Беларусь Верхнядзвінск адзначаў і свята горада. Гэта надавала агульнай нацыянальнай урачыстасці асаблівую цеплыню і блізкасць. Верхнядзвінцы адчувалі сябе часцінкай вялікага народа, які ганарыцца сваім мінулым, радуецца мірнаму і стваральнаму жыццю, марыць аб шчаслівай будучыні для дзяцей і ўнукаў.
Па традыцыі напярэдадні свята жыхары горада ўшанавалі памяць воінаў, якія абаранялі нашу зямлю ад фашысцкіх захопнікаў. У скверы ля мемарыялу загінуўшым героям адбылася літаратурна-музычная кампазіцыя «Памяць нашага горада», ускладзены кветкі і вянкі да помнікаў.
3 ліпеня гарадскі парк сустракаў удзельнікаў свята багатай праграмай. На гэты раз яна пачалася незвычайна — першымі на сцэну падняліся прадстаўнікі працоўных калектываў, занесеных на раённую Дошку гонару, а таксама прадпрыемстваў і арганізацый розных галін народнай гаспадаркі. Землякі мелі магчымасць падзякаваць ім за працу, у выніку якой раён з году ў год павялічвае вытворчыя паказчыкі, пашырае выпуск уласнай прадукцыі, забяспечвае жыццядзейнасць сацыяльнай сферы.
З прывітальным словам да прысутных звярнуўся старшыня раённага выканаўчага камітэта І. І. Марковіч. Ён павіншаваў землякоў і гасцей з Днём Незалежнасці Рэспублікі Беларусь, 69-й гадавінай вызвалення краіны ад фашысцкіх захопнікаў і святам горада Верхнядзвінска.
— Ёсць даты, — адзначыў кіраўнік раёна, — якія выклікаюць пачуццё нацыянальнай гордасці і пашаны, з’яўляюцца асновай патрыятызму і грамадзянскасці, аб’ядноўваюць людзей. У гэты асобы дзень мы нізка кланяемся ветэранам Вялікай Айчыннай вайны, ушаноўваем памяць ахвяр вогненных гадоў. У час выпрабаванняў беларусы крывёй заплацілі за свабоду, гераічнай барацьбой заваявалі права на мірнае жыццё. Сучасны Верхнядзвінск памятае аб мінулым і з упэўненасцю глядзіць у будучыню. Свята горада нагадвае, што лёс Радзімы — гэта лёс кожнага з нас. Мы даказалі, што ўмеем захоўваць мір і парадак на роднай зямлі, працаваць і дасягаць пастаўленай мэты.
І. І. Марковіч падзякаваў верх-нядзвінцам за працу на карысць роднай зямлі і заклікаў умацоў-ваць яе новымі здабыткамі. Напярэдадні свята было прынята рашэнне аб прысваенні звання «Ганаровы грамадзянін Верхнядзвінскага раёна» людзям, якія ўнеслі значны ўклад у развіццё рэгіёна. Гэтага звання ўдастоены Вацлаў Якаўлевіч Сяргушка — ветэран працы, які 30 гадоў узначальваў перадавы калгас імя Леніна, узнагароджаны ордэнамі Леніна і Працоўнага Чырвонага Сцяга; Іван Іванавіч Грынько — генеральны дырэктар ААТ «Верхнядзвінскі райаграсервіс», заслужаны работнік сельскай гаспадаркі Беларусі; Аляксандр Паўлавіч Міронаў — ветэран педагагічнай працы, выдатнік асветы, стваральнік дзіцячых творчых калектываў, аўтар гімна Верхнядзвінска. Кіраўнік раёна павіншаваў лаўрэатаў з прысваеннем ганаровага звання і ўручыў адпаведныя пасведчанні.
Віншавалі на свяце і сямейных юбіляраў. Імі сёлета сталі Сяргей Пятровіч і Таццяна Пятроўна Валковічы, Васіль Яўгенавіч і Аксана Вячаславаўна Ахламёнкі, Марат Робертавіч і Святлана Уладзіміраўна Саакян, Мікалай Мікалаевіч і Таццяна Паўлаўна Столп, Мікалай Вячаслававіч і Алена Сігізмундаўна Захарэвічы. Землякі апладысментамі віталі сямейныя пары, якія пранеслі праз жыццё вернасць і любоў, самааддана клапоцяцца аб дзецях і перадаюць нашчадкам лепшыя традыцыі.
Свята набірала разбег на канцэртнай пляцоўцы, дзе нумары аматарскай творчасці гледачам прадставілі салісты і калектывы РДК, Запрудзьеўскага, Бігосаўскага і Сар’янскага Дамоў культуры.
З інтарэсам удзельнічалі верхнядзінцы ў віктарыне, прысвечанай гісторыі роднага горада, і заваёўвалі прызы, падрыхтаваныя працоўнымі калектывамі.
Увогуле, забаў і відовішчаў у парку было на любы ўзрост і густ. Дзеці з задавальненнем вабілі час у конкурсах на гульнёвай пляцоўцы, каталіся на конях, забаўляліся на атракцыёнах. Нямала цікаўных сабралі выступленні пагранічнікаў-кінолагаў, супрацоўнікаў РАНС і спартсменаў клуба «Віцязь». Для жадаючых таксама былі арганізаваны забаўляльныя спартыўныя мерапрыемствы.
Тэматыка, прысвечаная роднаму гораду і яго жыхарам, з’яўлялася галоўнай на выставах творчых работ навучэнцаў Верхнядзвінскай ДШМ, устаноў адукацыі, фотавыставах В. Салаўёва, І. Окуневай, Г. Ахламёнка. Цікавыя гістарычныя матэрыялы былі прадстаўлены на экспазіцыях музея імя Чэрскага і раённай бібліятэкі «Верхнядзвінская скарбонка».
Госці свята маглі ацаніць прадукцыю мясцовых прадпрыемстваў на выставе «Гэта наш прадукт», пакаштаваць хлебабулачныя вырабы і сыры на дэгустацыйных сталах і нават увачавідкі ацаніць прафесійнае майстэрства работнікаў лясгаса па распілоўцы драўніны.
Працавалі ў парку імправізаваны «Здраўпункт» Верхнядзвінскай ЦРБ і дабрачынны кірмаш ТЦСАН. Як заўсёды, багатымі былі выставачныя рады народных майстроў раённага Дома рамёстваў.
Людзі сярэдняга і пажылога ўзросту з задавальненнем удзельнічалі ў танцавальнай праграме «Модна быць маладым», арганізаванай клубам «Ветэран».
Усеагульны інтарэс выклікаў конкурс «Ёсць талент!», арганізаваны сярод устаноў і прадпрыемстваў раёна. Удзел у ім прынялі 14 працоўных калектываў, якія прадставілі гледачам свае нумары аматарскай творчасці. Пераможцамі конкурсу прызнаны самадзейныя артысты райспажыўтаварыства, якія паказалі тэатралізаваную сцэнку, вакальны ансамбль райгазу і саліст Раман Шакель з аддзела пагранічнай службы «Верхнядзвінск».
Удзельнікі свята маглі адпачыць на танцавальных пляцоўках, пакаштаваць шматлікія пачастункі райспажыўтаварыства, паўдзельнічаць у забаўляльных мерапрыемствах.
Свята доўжылася да позняй ночы і вянчалася агульнарэспубліканскай акцыяй «Спяём гімн разам», падчас якой верхнядзвінцы з гонарам выканалі Дзяржаўны гімн Рэспублікі Беларусь. Выдатным завяршальным акордам стаў вялікі салют, за які гледачы сардэчна дзякуюць спонсару.
С. ДЗВІНСКАЯ.
В. САЛАЎЁЎ (фота).
