XXX Міжнародны фестываль мастацтваў «Славянскі базар у Віцебску» праходзіў 14-19 ліпеня.
Старт фестывалю на канцэрце адкрыцця даў Аляксандр Лукашэнка. «Я хачу сказаць ад усёй душы дзякуй артыстам і арганізатарам, жыхарам і гасцям Віцебска – усёй вялікай сям’і фестывалю – за тое, што, як і 30 гадоў таму, мы адчуваем гэту дзіўную атмасферу свята і народнага адзінства. З юбілеем, «Славянскі базар!» – заявіў Прэзідэнт.
Сімвал станаўлення незалежнай Беларусі
Фестываль «Славянскі базар у Віцебску» стаў адным з сімвалаў станаўлення незалежнай Беларусі. Аб гэтым Прэзідэнт Беларусі Аляксандр Лукашэнка заявіў на цырымоніі адкрыцця XXX Міжнароднага фестывалю мастацтваў «Славянскі базар у Віцебску».
Прэзідэнт канстатаваў, што разам з фестывалем вырасла цэлае пакаленне беларусаў, ён укараніўся на зямлі, якую па праву можна лічыць калыскай беларускай самабытнасці. «Віцебшчына, якая падарыла нам Шагала, Пэна, Азгура, Быкава і Фрадкіна, стала цэнтрам прыцягнення для творчых людзей у XXI стагоддзі», – сказаў кіраўнік дзяржавы.
Аляксандр Лукашэнка адзначыў, што сёння фестываль у Віцебску – гэта самы аўтарытэтны міжнародны конкурс прафесійнага вакальнага майстэрства. «Падкрэслю – конкурс прафесійнага майстэрства, а не шоу-тэхналогій, створаных толькі для іміджу і жадання пацешыць нечае самалюбства. Ён існуе ў імя людзей, дружбы і адзінства, таму што толькі ў адзінстве народаў ёсць сіла, якая пераадольвае любыя перашкоды, – заявіў Прэзідэнт. – І як бы ні курчыліся ў інсінуацыях крытыкі дзяржаўнай і маёй асабістай падтрымкі «Славянскага базару», мы яго адстаялі і ні разу не пашкадавалі, што кожны год праводзім гэты цудоўны фестываль».
«Славянскі базар» – у календары культурнага жыцця многіх народаў
«Наш фестываль стаў першай маштабнай культурнай падзеяй пасля развалу Савецкага Саюза. Калі былі разарваны тысячы ніцей, што звязваюць братэрскія народы, ніхто нават уявіць не мог, якая роля была прызначана «Славянскаму базару». Тры дзесяцігоддзі таму мы пачалі шлях «праз мастацтва да міру і ўзаемаразумення», і нам удалося ўпісаць сваё свята ў каляндар культурнага жыцця многіх народаў, аб’яднаць аднадумцаў больш як з 70 краін», – заявіў Аляксандр Лукашэнка.
Кіраўнік дзяржавы адзначыў, што, калі на карце свету з’явіліся новыя славянскія і еўразійскія дзяржавы, калі ў гісторыі розных народаў пачалася новая эпоха, людзям, разгубленым і адарваным адзін ад аднаго, як ніколі патрэбна была надзея на захаванне духоўных і братэрскіх сувязей. Гэту надзею падарыў «Славянскі базар». «Ён даў усім упэўненасць у будучым, фундамент якога быў закладзены савецкімі традыцыямі міжнацыянальнага міру», – падкрэсліў Прэзідэнт.
Беларусь расчыніла свае дзверы
для сяброў
Ніці фестывалю «Славянскі базар у Віцебску» прадаўжаюць звязваць людзей у свеце, які ўжо даўно не быў так раздзелены, як цяпер, заявіў Прэзідэнт Беларусі Аляксандр Лукашэнка.
Кіраўнік дзяржавы адзначыў, што артысты, мастакі, рамеснікі, якія прыязджаюць на фестываль з розных краін і кантынентаў, заўсёды гавораць на адной мове – мове дружбы, мастацтва і творчасці. «І таму ніці «Славянскага базару» прадаўжаюць звязваць людзей у свеце, які ўжо даўно не быў так раздзелены, як цяпер – і не толькі пандэміяй і гібрыднымі войнамі», – сказаў Аляксандр Лукашэнка. Прэзідэнт заўважыў, што ў той час, як некаторыя дзяржавы будуюць агароджы, раздзяляючы людзей калючым дротам, Беларусь расчыніла свае дзверы для сяброў.
Білет на фестываль дазваляе наведаць Беларусь грамадзянам 74 дзяржаў без віз. «А сябрам Беларусі запрашэнне ніколі і не патрабавалася, – дадаў ён. – Мы заўсёды па-беларуску рады гасцям і соты раз паўтараем: прыязджайце, паглядзіце на нашу краіну – нам ёсць чым ганарыцца і чым вас прыемна здзівіць», – заявіў беларускі лідар.
Аляксандр Лукашэнка адзначыў, што сцэна Летняга амфітэатра ў Віцебску памятае вялікіх Уладзіміра Мулявіна, Людмілу Зыкіну, Ігара Лучанка, Эдзіту П’еху, Мішэля Леграна і Андрэя Пятрова. Яна стала стартам для яркай кар’еры папулярных артыстаў: Таісіі Павалій і Русланы, Пятра Ялфімава і Алёны Ланской, Дзімаша і многіх іншых.
«Тут кожны год робяць свае першыя творчыя крокі ўдзельнікі дзіцячага музычнага конкурсу – гэта будучае нашых краін».
Узводзіць масты, а не сцены
Паводле слоў Прэзідэнта, аб’яднаўшы на адной сцэне прадстаўнікоў усіх славянскіх народаў, народаў былых саюзных рэспублік, прыцягваючы з кожным годам удзельнікаў і гасцей з новых краін, фестываль не мог не стаць раздражняльнікам для тых, каму не патрэбна адзінства гэтых краін. « Нас спрабуюць раздзяліць, таму мы павінны прыкласці максімум намаганняў, каб захаваць гэты вялікі фестываль, які тры дзесяцігоддзі радуе народ. Тым, хто не хоча, каб людзі з іншых дзяржаў убачылі Беларусь на свае вочы, а не скрозь прызму фальшывых СМІ і Telegram-каналаў, мы павінны сказаць: прыязджайце да нас, дзверы адчынены. Аблудным, ачумелым – паглядзіце на нас», – дадаў беларускі лідар.
Але, звярнуў увагу Аляксандр Лукашэнка, нягледзячы на ўсе абставіны, са сцэны Летняга амфітэатра ў Віцебску гучаць тры брацкія ўсходнеславянскія мовы: беларуская, руская і ўкраінская. А таксама мова міжнародных стасункаў. «Калі ласка, размаўляйце на любой мове, мы нікому не закрываем рот. Але аснова – гэта наша, славянскае, мужных славян – гэтыя тры цудоўныя мовы. «І гэтыя вялікія мовы гучалі і заўсёды будуць гучаць, таму што яны належаць народам», – падкрэсліў ён.
Прэзідэнт адзначыў, што штогадовыя спецыяльныя ўзнагароды і прэміі – гэта толькі малая частка прызнання таго ўкладу, які на справе ўносяць творчыя людзі ва ўмацаванне сувязей паміж брацкімі народамі. Ён заявіў, што залатымі літарамі ўпісаны ў гісторыю фестывалю імёны драматурга Аляксея Дударава, народнага пісьменніка Беларусі Івана Шамякіна, народных артыстаў Расіі і Беларусі Аляксея Пятрэнкі, Уладзіміра Гасцюхіна, дырыжора Міхаіла Фінберга, народнага мастака Савецкага Саюза Міхаіла Савіцкага, кампазітара Аляксандры Пахмутавай, паэта Мікалая Дабранравава і, вядома ж, першага дырэктара фестывалю Радзівона Баса.
«Гэтыя людзі – і ў гэтым іх асаблівасць – ніколі не спрабавалі прыстасавацца пад палітычную або іншую кан’юнктуру, не лавілі хайп, а былі сапраўднымі падзвіжнікамі мастацтва, пасламі міру і дружбы», – сказаў Аляксандр Лукашэнка.
Па матэрыялах БелТА.
