Менавіта такую назву атрымала святочная праграма, якую сумесна падрыхтавалі для школьнікаў супрацоўнікі дзіцячай бібліятэкі і Верхнядзвінскай дзіцячай школы мастацтваў у Міжнародны дзень роднай мовы.
На свята ў чытальнай зале бібліятэкі сабраліся вучні Верхнядзвінскай ДШМ і сярэдняй школы №2. Хлопчыкаў і дзяўчынак чакала цікавая і пазнавальная праграма, падчас якой яны маглі бліжэй пазнаёміцца з беларускай мовай, літаратурай і нават музыкай. Успомніць пройдзенае на школьных уроках і даведацца пра нешта новае ім дапамагалі бібліятэкары і супрацоўнікі Верхнядзвінскай дзіцячай школы мастацтваў. Актыўны ўдзел прымалі і самі дзеці: яны выразна чыталі вершы, спявалі і гралі на музычных інструментах. На самым бачным месцы красаваліся малюнкі навучэнцаў ДШМ і выстава беларускамоўных кніг.
Адкрыла святочную праграму Адэліна Мацук з творам Максіма Танка «Родная мова». Вершаваныя радкі, якія кожны беларус ведае з малых гадоў, прагучалі шчыра і эмацыйна.
Трыо гітарыстаў Верх-нядзвінскай ДШМ пазна-ёміла прысутных з музычнай кампазіцыяй «У гасцях у Наталі». Яе аўтар – Алег Капенкоў, беларускі гітарыст, кампазітар, аранжыроўшчык, лаўрэат Міжнародных конкурсаў кампазітараў і кіраўнік Клуба Гітарыстаў Беларусі.
Пасля двух цудоўных творчых нумароў загадчык дзіцячай бібліятэкі В. Марачкоўская прапанавала маленькім гасцям свята трошкі пагуляць і паадгадваць беларускія загадкі-жарты. Школьнікі з рызыкай давалі адказы, лёгка спраўляючыся з усімі заданнямі. А вы ведаеце, што пазычае ў сабакі бессаромны чалавек? А што бяруць у рукі, калі хутка ўцякаюць? Канешне, гэта вочы і ногі!
Пасля актыўнага «мазгавога штурму» неабходна крыху перадахнуць. Бадзёры і вясёлы музычны перапынак падрыхтаваў Яраслаў Барсток, які спеў жартоўную песню «Бульба».
Адпачылі – і зноў да ведаў! Наступным заданнем для дзяцей было паспрабаваць перакласці беларускія словы, якім нама адпаведнікаў у рускай мове: адвеку, бярозавік, збочыць, знічка, маладзік. І з гэтай задачай госці свята таксама паспяхова справіліся – адразу бачна, што ўрокі ў школе не прагульваюць!
Елізавета Лісоўская выдатна прачытала верш Яніны Жабко «Куточак зямлі», а Іван Панцялей пранізліва выканаў на гітары кампазыцыю беларускай аўтаркі Аксаны Кавалевіч «Ціхая малітва».
Напрыканцы свята прыйшоў час праверыць, як добра дзеці ведаюць родную мову. Вядучая паказвала карткі з карцінкамі, а школьнікі павінны былі па-беларуску назваць тое, што на іх намалявана. Словы ў малюнках «хаваліся» складаныя, «з падвохам»: ковёр – дыван, пылесос – пыласос, ежевика – ажыны і многія іншыя. Але маленькія мовазнаўцы з заданнем у чарговы раз справіліся.
Прагучаў верш Уладзіміра Мазго «Белы буслік» у выразным выкананні Данаты Сысоевай, пасля чаго госці свята адправіліся на невялічкую экскурсію на першым паверсе раённай бібліятэкі. У чытальнай зале разгарнулася выстава значкоў з калекцыі Мікалая Запасніка «Большая история в маленьких вещах». Дзеці з захапленнем разглядалі экспанаты, фатаграфавалі іх на тэлефоны і задавалі пытанні калекцыянеру.
Не менш эмоцый выклікаў этнаграфічны музейны пакой, дзе з дапамогай жыхароў раёна супрацоўнікі бібліятэкі сабралі шмат розных прадметаў беларускага і савецкага побыту. Пра самыя цікавыя рэчы расказала загадчык аддзела абслугоўвання і інфармацыі раённай бібліятэкі Н. Глацёнак. Яна адзначыла, што прыйсці на экскурсію ў этнаграфічны пакой можна ў любы зручны час.
Дзеці зладзілі сапраўдную фотасесію на памяць, зрабілі здымкі экспанатаў, якія спадабаліся ім больш за іншыя, каб пасля паказаць сябрам і бацькам. І паабяцалі яшчэ не раз прыйсці ў бібліятэку – у тым ліку і за кнігамі на беларускай мове.
Алёна МАРОЗ.
Фота аўтара.
