Пальмовая або Вербная нядзеля адзначаецца за тыдзень да Вялікадня. У гэты дзень вернікі ўспамінаюць уваход Госпада ў Іерусалім, калі ізраільскі народ сустрэў Ісуса як Месію, кідаючы на дарогу вопратку і пальмовыя галіны з крыкамі: “Гасанна ў вышынях! Блаславёны той, хто прыходзіць у імя Пана!”.
Прыходзячы ў храм з вербачкамі, якія сімвалізуюць жыццё, людзі прызнаюць Ісуса сваім Збаўцам, прадвяшчаюць вялікую падзею, якая адбудзецца праз тыдзень. Напярэдадні Вербнай нядзелі адзначаецца Лазарава субота, якая ўпэўнівае нас у вечным уваскрасенні. Ісус ведаў: народ, які будзе вітаць яго ў Іерусаліме, хутка адрачэцца ад яго. Прадракаючы гэтыя падзеі, ён папярэджвае людзей, каб яны не паддаліся спакусам, і ўмацоўвае іх веру, уваскрасаючы Лазара.
Пальмовай нядзеля перад Вялікаднем стала называцца з ХІ стагоддзя, калі ўзнік звычай бласлаўляць у гэты дзень пальмовыя галінкі. Паколькі ў Беларусі, як і ў суседніх краінах, пальмы не растуць, вернікі прыходзяць у храм з галінкамі вярбы, якія па-рознаму ўпрыгожваюцца. Адсюль яшчэ адна назва свята — Вербная нядзеля, або Вербніца.
Асвячоныя ў храмах галінкі вярбы прынята захоўваць на працягу ўсяго года. Як правіла, імі ўпрыгожваць абразы і “чырвоныя куты”.
Пальмовая нядзеля ўводзіць вернікаў у апошні этап падрыхтоўкі да галоўнага хрысціянскага свята і распачынае Вялікі тыдзень, або Тыдзень пакутаў Гасподніх, падчас якога асаблівым чынам звяртаецца ўвага на такія падзеі, як апошнія дыскусіі Хрыста з іудзеямі ў святыні, прадказанне аб разбурэнні Іерусаліма, апошняя вячэра з вучнямі (Вялікі, “чысты” чацвер), укрыжаванне Ісуса (Вялікая пятніца), прабыванне Хрыста ў труне (Вялікая субота).
Тыдзень перад Вялікаднем прынята праводзіць у Храме. Многія звязваюць “чысты” чацвер з хатнімі клопатамі, неабходнасцю прыбрацца і прыгатаваць велікодныя стравы. Але Вялікі чацвер у першую чаргу нагадвае нам пра важнасць чысціні духоўнай. Гэта дзень усталявання сакрамэнту Еўхарыстыі на Таемнай вячэры. І нам варта далучыцца да гэтай вячэры, прычасціцца перад Вялікаднем. Вядома, на Тыдні пакутаў Гасподніх трэба прысвяціць пэўны час і падрыхтоўцы да свята. Але варта так распланаваць свой дзень, каб гэтыя клопаты не перашкаджалі наведванню храма і малітве.
